قصيدة يوميات نائب فى البرلمان
===================
انا كنت ماشى فى ساعة نهار وسمعت دوشة ودق وزار
بيقولوا ترشيح للبرلمان دى شغلة هايلة فوايدها كتار
مركز وقيمة وكيلو خيار وتخليل مصالح فى البرطمان
وتمنها سمنة وزيت لسولار وبلطجية من الأخيار
وتلميع لصورة فى الاعلام ولسان بيكذب كله تمام
وتربيطات لرجال أعمال وقعدات قهاوى مع الاحلام
وتعمل من البحر طحينة ووعود امانى فى اثينا
وأهو كذب أبيض عشان المرور وفى حج عمرة يكون مغفور
والدخلة تبقى برجل يمين يعقبها صقفة مع الاسافين
وتثبت فى كلام كده بالملايين بلباقة وشطارة مع وزير
وترد لرجال بعض الدين وبزبيبة حتبقى رجل الدين
وحساب مجمع فى حصالة واديها بمبة بحصانة
وتعرف تنام كده فى الجلسات وتقبض تمنها حاجات وحاجات
صحيان ونوم كله مصالح واللى بيزعل بيتصالح
وتحط لايحة للأسعار دى العيشة صعبة وبقت نار
وكله فى ميزانك كده حسنات والرك برضه على النيات
ومهم تختار احلى شعار للدايرة وناخبيها الأحرار
والرمز يبقى المنشار فى خدمتك ليل ويا نهار
واللى يشوفك بعد الزار ليه جايزة كده بالزيت الحار
وقلت ياسلام ياسلام لو أبقى نائب فى البرلمان
كانت دى تضحك لى الأيام وأكل فى بط ويا حمام
واتاريه ده حلم كان فى منام ترشيح لنائب فى البرلمان
وخللت فلفل فى برطمان يمكن ده يتحقق فى زمان
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
