مجلة حروف من الياسمين*** " ابتدى منين الحكايه / م الأول / م النهايه ؟؟ " بقلم / زهرة الفرجينيا

زهرة الفرجينيا

ابتدى منين الحكايه /
م الأول / م النهايه ؟؟

بطلها راجل زين وحكيم
قدر عليه يعيش همه
اصلى الحكيم اللى حكم

ابدا مايخافشى قبور
والضلمه ديه ف عينه نور
بس اخونا دا انظلم

اخوه كان زينة الشباب
حافظ كتير م الكتاب
قرآنه كان دايما معاه

بس المصايب جات قوام
واتقتل وسط الزحام
والحكايه ياخويا صارت

تار ف تار / ودى بداية المشوار
امه قالت ولدى غالى
انظروا مره لحالى

عايزه خمسه يموتوا منهم
اصلى ولدى اغلى غالى
ف يوم خدوا بتارهم وضربوا

والبقيه راحوا هربوا
ضربوا منهم دوغرى/ ماتوا
أربعه انضربوا وماتوا

وامه فرحت لجل تارها
عاد إليها جوه دارها
ليه ياكبيره تبقى عيشتك بحر دم

والبيوت خرب قوام
قالت كده / كله تمام
دا عدلنا / مين زينا

اخدنا تارنا / وصار بيبكى / عدونا
قلت ياحاجه المسامح دا كريم
قالت امشى ياجبان يا ابن اللئيم

دى عاداتنا / من زمان
فهمت يا إبن اللئام
هوه دا فصل الكلام

ولا مره يحصل لى ملام
قلت ياحاجه المسلسل
ماشى بيكر ف فصوله

قالت دا برضه/ قول تقوله
ده قصاص / كان رصاص
أو غير رصاص

المسائل دى إحساس
تار بتار / وده قرار
قلت لها ياقاسيه كفايه

إعملى لفيلمك نهايه
واللا راح يبقى مسلسل
كل حلقه تحكى هم

تروى ارضك ديه دم
بطلوا عادات زمان
بلا ثأر بلا أفلام زمان

قالت يابويا ده تمام
هو دا فصل الختام
واللى مش عاجبه الكلام

يبقى مش فاهم حياتنا
ابنى مات/ بس تاره
عاد إلينا واكتر كمان

ابنى زارنى ف المنام
قال يا امى / كدهه تمام
ارتحت وارتاحت حكايتى

وبقيت ف جنة الرحمن
قلت لها ياست الحكايه
كلها منذ البدايه

جهل ومعشش ف روسكم
صححوا كل العادات
عيشوا ف سلام

عيشوا ف تبات
قالت الحجه كفايه
مش سامعه منك كلام

انت خليك ف العلام
هوه دا حالنا ياخويا
من ايام جدود أبويا

جاى تغير كل حاجه بلاش تصدعنى ياخويا
وسيبنا عايشين ف العادات
وفر عليك ياللا العظات

كل قولك ده غلط
حتى لو إحنا ياخويا
لسه ماشيين ف الغلط

سيبنا نمشى ف الغلط
وانت روح شوف لك كتاب
وسيبنى فى عيشة العذاب

بقلمى عزة احمد ابوزيد