مجلة حروف من الياسمين ** - بقينا ليكي - بقلم الشاعر / محمد رمضان

** - بقينا ليكي - **

ناس داخلين
و ناس خارجين ...
ناس واقفين
و ناس قاعدين .
بيني و بينك
خطوتين اتنين .
يدوب ح أطل
في عنيكي ...
لقيت قلبي
راح طاير
و متمدد على
حجرك كأنة
رضيع .
حُفت عليه
لَيِتْكَسَرْ ...
و أتوه و أضيع .
لقيت ايدك
بتطبطب عليه
و تضم .
و عنيكي عليه
بتحن .
شُفت حقيقي
أجمل أُم .
و أتوه في عيونك
الحلوين كما
الدرويش .
و أنادي لقلبي ...
ارجع لي ...
يقول ... مبجيش .
و فجأة لقيت
أنا روحي
سيباني ...
و حواليكم كمان
بِتْدُور ...........
في ايدها مبخره
و بخور .........
بتسمي باسم الله
و بتصلي على نبينا
بترقيكم .............
رقيتكم ربي يحرسكم
و جوه عيوني خبيتكم .
دعيت ربي ...........
م ييجي يوم
يفرقكم .
دعيت ربي ...........
يِفَرْحكم و يسعدكم .
يِسَكِن الهَنا داركم .
يرزقكم بنات و بنين
ويجعلهم من
الصالحين .
يحميكم من الشياطين .
من الحاقدين ............
من عين أي ناس
داخلين .
عين أي ناس خارجين .
عين أي ناس واقفين .
عين أي ناس قاعدين .
رقيتكم حتى من عيني
و بصت ناحيتي
و ليكم
و قالت يلا قولوا ......
آآآآآآآآمين .
ياساكنه جوه شراييني
يا أجمل حلم مستنيه
بقالي سنين .
أنا و قلبي بقينا ليكي
ياضي العين .
أنا و قلبي بقينا ليكي
يا لحن حنين .
أنا و قلبي بقينا ليكي
بأطهر حُب ح نسطر
أجمل قصه للعاشقين

بقلبي و قلمي 7 / 10 / 2015
محمد رمضان